البابا كيرلس الرابع - ابو الاصلاح

🌿 التاريخ
10 فبراير 2023
3 أمشير 1739ش
درسنا بيتكلم عن (البابا كيرلس الرابع - ابو الاصلاح)
🌿الهدف :
👈ان يعرف الطفل سيرة حياة البابا كيرلس الرابع
👈ان يشعر بمحبته للتعليم
👈ان يتدرب على القراءة فى كافة المجالات و تحت ارشاد👪
🌹الاية:فتشوا الكتب لأنكم تظنون ان لكم فيها حياة ابدية و هى التي تشهد لي
(يو 39:5)
🌟الدرس🌟
قديسنا اليوم هو بطريرك عظيم من بطاركة كنيستنا القبطية💒
هو البابا كيرلس الرابع ابو الاصلاح وهو البابا رقم 110 على كرسى مارمرقس الرسول
👶اتولد فى مدينة جرجا فى صعيد مصر سنة 1815م
👦 وكان شاطر جدا" من صغره اتعلم حاجات كتيرة غير القراءة و الكتابة
اتعلم اللغة القبطية و كان شماس جميل
لما كبر شوية بقى عنده 22 سنة فكر انه يبدأ حياة الرهبنة 🌾و فعلا قرر انه يكون راهب فى دير الانبا انطونيوس فى البحر الاحمر🏝
باسم ابونا داود الانطونى
👈اشتهر منذ بداية رهبنتة بحسن تدبيره فى حل المشاكل
و فى الوقت ده كان فيه مشاكل عقائدية فى الحبشه فطلب البابا بطرس الجاولى
من ابونا داود الانطونى انه يسافر للحبشه لحل المشاكل دي
و فعلا قدر انه يحل المشاكل و اقنع الشعب هناك انهم يرجعوا الى الارثوذكسية🍀
👈 و بعد سنتين من رهبنتة اتنيح رئيس الدير و بالرغم من صغر سنه
إلا أن ربنا اعطاه نعمه كبيرة فى عيون الرهبان و اختاروه ليكون رئيس للدير
و ارسلوا رهبان الدير كتاب 📩تذكية للبابا بطرس الجاولى ووافق البابا
و اصبح رئيسا لدير الانبا انطونيوس و هو عمرة 24 سنة
👈اهتم جدا بمكتبة الدير 📚مش بس كده
بل اهتم بكل حاجة خاصة بالدير و عمل مكتبة و مدرسة كبيرة جدا فى بنى سويف

🌿بعد نياحة البابا بطرس الجاولي
كان اسم ابونا داود الانطونى من ضمن الاسماء المرشحة للكرسى البابوي
و كان الخديوي عباس هو حاكم مصر 🇾🇪 فى ذاك الوقت وكان عنده مجموعة من السحره والمنجمين اللي فهموه انه لو رسم أبونا داود بطريرك للاقباط هيموت بعد رسامته على طول
🤔 واضح انهم كانوا خايفين من ابونا داود ومن قداسته والحاكم في الوقت ده كان بيؤمن بكلام السحره وفعلا اجل رسامته
فراحوا الاباء للخديوي وقالوا له بلاش يبقى بطريرك بس احنا عايزينه اسقف عام على الكرازه وفعلا الفكره دي عجبت الخديوي ووافق
وفعلا اترسم باسم الانبا كيرلس الاسقف العام
👌واول ماترسم اسقف ابتدأ بنشاط كبير اوي فعمل إصـلاحات وترمیمـات لكنـائس كتیـر وبنى مكتبـات وعلم النـاس حاجات كتير خالص وفضل اسقف عام لمدة سنة و شهرين وربنا كان دائما مدي له نعمة فى عيون الناس و عين الخديوى
👈ولأنه كان أمین جدا ونشیط وقديس قرروا انهم یرسموه بطریرك.
وفعلا بقي بطريرك و اصبح اسمه البابا كيرلس الرابع 🌈

و خلال فترة جلوسة على الكرسى البابوي
اهتم البابا كيرلس الرابع بحاجات كتيرة جدا" و من اهمها
👈 اولاً :- اهتم بالتعليم
و هو اول من انشأ كلية بجوار البطريركية تعلم جميع اللغات
انجليزى – ايطالى – فرنسى – قبطى و كان بيشرف عليها بنفسة

👈ثانياً:- قدر البابا كيرلس الرابع انه يوفر مبلغ 6000 جنيه (و دا كان مبلغ كبير جدا وقتها) علشان يبني اول مدرسه وكان اسمها مدرسة الاقباط الكبري التى تخرج منها رؤساء وزارات و مسئولين كبار فى الدولة
لانها كانت بتقدم اعلى مستوى تعليم فى مصر

👈ثالثاً :- نادى بتعليم المرأة و طلب من الكهنة انهم فى عظاتهم يعلموا الشعب بضرورة تعليم البنات وانهم هيعلموهم كمان الطبخ والخياطة علشان يشجع الاهل لارسال بناتهم للتعليم وبالفعل انشأ اول مدرسة للبنات🏢

👈رابعاً:- جعل التعليم مجانا و كان بيوزع الكتب و الاقلام مجانا علشان يشجع الناس على التعليم
علشان كده اطلقوا علية البابا كيرلس الرابع أبو الاصلاح

👈خامساً- اهتم بتعليم الالحان و اللغة القبطية
👈سادساً- طلب موافقة الخديوى انه يشترى مطبعة من المانيا و دى كانت ثانى مطبعة فى مصر بعد المطبعة الاميرية
طلب البابا كيرلس الرابع من الكهنة و الشعب بانهم يستقبلوا المطبعة الجديدة بالالحان و الترانيم
علشان يعلم الشعب انه يكرم العلم و التعليم و ان المطبعة هتساهم بدور كبير جدا فى نشر التعليم
🎚️و كان اول كتاب يطبعة هو القطمارس ووزعة على الايبارشيات
وعلشان كل التعاليم والاصلاحات اللي عملها البابا كيرلس الرابع لقبته الكنيسة
بالبابا كيرلس الرابع ابو الاصلاح

👈اتنيح البابا كيرلس الرابع فى 30 يناير سنة 1861 م بعد أن مكث علي الكرسي المرقسي فترة 6 سنين و7 شهور .
🌹الايه🌹
فتشوا الكتب لأنكم تظنون أن لكم فيها حياة أبدية وهي التي تشهد لي (يو39:5)
معني الايه أن ربنا بيقولنا أن احنا لازم نقرأ كلامه علشان لما هنقرأ الكتاب المقدس هنعرف ربنا اكتر و هنعرف وصاياه اللي بيها هندخل السماء ويبقي لينا حياة أبدية لأن بدون ربنا محدش يفكر أنه هيقدر يروح السماء

🌟التدريب🌟
علشان كده حبايبي لازم نقرأ جزء من اصحاح من الكتاب المقدس بانتظام كل يوم لبناء روحي والمجتمع الذي اعيش فيه وكمان ممكن نتعلم نقرأ كتب مختلفه عن (الفضاء- الطيران- النباتات- الحيوانات.....) كثقافه يعني نعرف معلومات زياده ولكن بإرشاد من بابا وماما عن اسم الكتاب .
بركة صلاته فلتكن معنا امين 🙏