القديس الأنبا بيشوي

🌹درسنا اليوم🌹
🌹 بيتكلم عن القديس العظيم
(( الانبا بيشوى حبيب مخلصنا الصالح ))
🎈الهدف من الدرس🎈:
👈ان يعرف الطفل قصة حياة الانبا بيشوى
👈ان يشعر الطفل بحب الصلاة و التمتع بوقت الصلاة
👈ان يتدرب الطفل على الصلاة باستمرار و صلاة المزامير بعض الاوقات
🎈آية الدرس🎈: " يا سامع الصلاة ، اليك يأتى كل البشر " (مز ٦٥ : ٢ )
🎈مرجع الدرس🎈:
👈 السنكسار
🎈الدرس🎈:
▪اتولد القديس الانبا بيشوى سنة ٣٢٠م فى مدينة المنوفيه
▪كان الانبا بيشوى من ضمن ٧ اخوات 👨‍👨‍👧‍👧👨‍👦‍👦 وكان اضعفهم جسمانيا وربتهم مامتهم 🤱 على حب الكنيسة ⛪ و الصلاة و قراءه الكتاب المقدس
▪وكان بيشوى كل شويه يتكلم مع مامته ويطلب منها انها تحكيله حكاية من الكتاب المقدس 📖
▪وكان اخوات بيشوى بيهتموا بالشغل و بحاجات تانية كتيره ، لكن كان بيشوى بيهتم جدا بالصلاه
▪وفى يوم ظهر الملاك 👼 لامه و قالها ان ربنا عاوز يختار ولد من ولادها
راحت الأم قالت للملاك كلهم ملك ربنا
▪اختار الملاك بيشوى و قالت الام بس ده أضعف واحد فيهم
▪فرد الملاك قالها
ان قوة الرب فى الضعف تكمل
▪ولما كبر بيشوى و بقى عنده ٢٠ سنه حب انه يدى وقته كله لربنا فقرر انه يروح البريه (الصحراء )
▪وفعلا خرج بيشوى لبريه اسمها برية شيهيت ودى معناها ( ميزان القلوب )
▪وبدأ يتعلم بيشوى على يد راهب اسمه الانبا بموا
▪وكانوا الرهبان فى الفتره دى مش بيكونوا فى دير معين لكن كانوا بيتنقلوا من مكان لمكان وكان كل راهب كبير يجمع مجموعه من الرهبان الصغيرين عشان يعلمهم ازاى يصوموا و يصلوا و يغلبوا الشيطان باسم ربنا
▪وكان الانبا بيشوى بالرغم من أن جسمه ضعيف لكن كان بيقف يصلى بالساعات وكان بيبقى فرحان جدا لأنه واقف بيتكلم مع ربنا
▪وفى يوم الانبا بيشوى بعد ما خلص صلاه وراح ينام فكر ازاى انام واضيع وقت من غير ما اتكلم فيه مع ربنا 😞
وفعلا قرر الانبا بيشوى انه يصلى طول الليل علي قد ما يقدر
▪بس كان ساعات بتروح عليه نومه فقرر انه يربط حبل فى السقف ويربط فيه شعره عشان اول ما ينام الحبل يشده فيصحى ويكمل صلاه
▪وبكده فضل الانبا بيشوى يصلى اكتر وقت من الليل وكون علاقه حلوه قوى مع ربنا وكان بابا يسوع بيظهرله ويتكلم معاه
▪ ربنا ارشد مجموعه من الرهبان الصغيرين عشان يروحوا للأنبا بيشوي يتعلموا على ايده
وعلمهم الانبا بيشوى ان الصلاه مهمه جدا عشان بتوصلهم للسما
▪ومره جاله بابا يسوع على أنه شخص عادى اول ما شافه الانبا بيشوى رحب بيه وغسله رجله من تعب السفر وهو بيغسل رجله لقى مكان المسامير وبعد كده اختفى بابا يسوع
▪شرب الانبا بيشوى من الميه إللى غسل بيها رجلين بابا يسوع وجه واحد من الرهبان قاله الانبا بيشوى انه يشرب من الميه لكن الراهب رفض لأنها ميه مش نضيفه وجه تانى يوم ملقاش الميه راح قاله الانبا بيشوى الميه دى انا غسلت بيها رجلين بابا يسوع
حزن الراهب جداً وطلب من ربنا انه يسامحه
▪و مره الرهبان طلبوا من الانبا بيشوى انه يطلب من ربنا عشان يظهرلهم و فعلا طلب الانبا بيشوى من بابا يسوع وفعلا قاله انه هيظهر على الجبل
▪راحوا الرهبان فى المعاد إللى قالهم عليه بابا يسوع واستعدوا عشان يطلعوا الجبل وهما طالعين كان فيه راجل عجوز طلب انهم يساعدوه عشان يطلع الجبل لكن الرهبان كانوا مستعجلين ومحدش ساعده
▪لكن لما جه الانبا بيشوى شال الراجل العجوز على كتفه وطلع بيه الجبل وابتدا الانبا بيشوى يحس ان وزن الراجل بيزيد فرفع عينه يبص عليه لقاه بابا يسوع
▪قاله الانبا بيشوى يعنى يارب السما كلها متكفيش ليك وانا الخاطئ اشيلك على كتفى
▪راح قاله ربنا بصوت جميل يا حبيبى بيشوى انت جسدك هيفضل سليم ومش هيجرى له حاجه لأنك شيلتنى
▪زعل بقية الرهبان لما عرفوا أن بابا يسوع هو الراجل العجوز وافتكروا
الآيه إللى بتقول
" بما إنكم فعلتموه بأحد اخوتى هؤلاء الاصاغر فبى قد فعلتم " ( مت ٢٥ : ٤٠ )
▪وعند هجوم البربر على برية شيهيت ساب الانبا بيشوى البريه وراح الصعيد واسس دير كبير فى بلدة البرشا مركز ملوى
▪و لما بقى عنده ٩٧ سنه سافر للسما فى حضن بابا يسوع
▪وأراد ربنا ان يكون الانبا بيشوى قدوه لرهبان كتير وكمان زوار فسمح ربنا انه يتبنى دير على اسم الانبا بيشوى فى وادى النطرون
▪وبكده علمنا الانبا بيشوى ان الصلاه هى السلم إللى هيوصلنا للسما وهى مفتاح السما اللى بيه هنشترك مع الملائكة والقديسين فى التسبحة فى السما على الأرض .
🎈التدريب🎈
اننا نتعلم اننا نصلى كل وقت عشان الصلاه هى إللى هتوصلنا للسما