تيموثاوس أسقف أنصنا يصلى لأجل الوالى

🍀 درسنا بنعمه ربنا عن تيموثاوس اسقف انصنا يصلي لاجل الوالي
(قصه تيموثاوس الأسقف و الوالي )
🍀 *التاريخ *
🌹 الجمعه الموافق
11 نوفمبر 2022🌹
🌹 2 هاتور 1739ش🌹
🍀 الهدف :
+ ان يعرف الطفل انه بالحب و الصلاه يكسب حب الاخرين
+ان يشعر الطفل بالفرق بين مقابله الكراهيه بالحب و العكس
+ ان يتدرب الطفل ان يصلي من أجل المسيئين إليه و يسامحهم
🍀 الآية : احبوا اعداءكم باركوا لاعنيكم أحسنوا إلى مبغضيكم و صلوا لأجل الذين يسيئون اليكم و يطردونكم (متى ٥ :٤٤ )
🍀 الدرس :
درسنا النهارده بنعمه ربنا بيتكلم عن القديس الانبا تيموثاوس اسقف انصنا اللي صلى من أجل الوالي ان ربنا يسامحه 🙏 و يرشده
وازاي قابل الكراهيه 😠 بالحب ❤️ والتسامح🤝
والي انصنا يا أولاد كان والي جديد بعد الوالي اريانوس و كان مش بيحب المسيحيين خالص و سمع ان في انصنا اسقف اسمه تيموثاوس كان راجل بيقوي المسيحيين و بيشجعهم فقال للحراس هاتولي الأسقف بتاع البلد دي اللي اسمه تيموثاوس عشان اشوف حكايته ايه؟🤔
و فعلا احضر الجندي الانبا تيموثاوس الى الوالي و قاله انت بقا اللي بتساعد الجماعه المسيحيين و بتقويهم و تروح لهم السجون🏛 و تصلي لهم و تثبتهم في الايمان؟
رد الانبا تيموثاوس وقاله ايوه يا مولاي انا تيموثاوس و هفضل اعمل كده لغايه اخر لحظه في حياتي
ضحك الوالي بمكر🤔 و قاله طيب ايه رأيك لو خليتك المساعد بتاعي و الكاهن الأعظم عندي ؟ بس بشرط واحد انك تسجد للآلهه بتاعتي
رد عليه الانبا تيموثاوس وقاله وفر اغرآتك دي يا سياده الوالي انا مسيحي و هفضل مسيحي و عمري ما هتهز من اغرآتك مهما كانت لو هتديني فلوس العالم كله 💎 انا مستحيل أسيب الرب يسوع اللي فداني بحياته
اتعاظ الوالي طبعاً ....و قال انا هوريك😤 وطلب من الحراس انهم يعذبوه بكل انواع العذابات
و لما نشوف هيستحمل لغاية امتى ؟ و اكيد طبعا راجل كبير زيه👴 مش هيستحمل الجلد و العذابات دي كلها وطلب من الحراس انهم يستمروا في تعذيبه لما نشوف اخرتها معاه
في أثناء الوالي ما بيتكلم جات رساله من الملك العظيم قسطنطين يأمر الملك بخروج كل المسحيين من السجون بتاعتهم و رجوعهم لبيوتهم ⛪️ و تنفيذ الأمر حالا
الوالي قال ازاي ده يحصل و احنا بنعذب فيهم علشان يعبدوا الإلهه بتاعتنا
لكن اللي كان معاه الرساله قاله ان ده أمر من الملك و لازم يتنفذ حالا و أمر الوالي الحراس بإنهم يطلعوا كل المسجونين المسيحيين اللي عندهم حتى الانبا تيموثاوس
🌷 الانبا تيموثاوس يا حبايبي راكع بيصلي و حوله باقي الناس و الوالي واقف بيسمع الصلاه من بعيد
الانبا تيموثاوس بيصلي و بيقول اشكرك يا ربي يسوع لانك تجسدت و فديتني على الصليب+ اشكرك لانك سمحت لي ان اشهد لك قدام الوالي و الناس كلها
أرجوك 🙏يا رب كن مع الوالي خليه يشوف نورك و يعرف انك الإله الحقيقي و يمشي في طريقك
أرجوك🙏 يا رب فتح عنيه 👀
أرجوك ساعده علشان يوصلك انا يارب بحبه ❤️ علشان انت علمتني احب كل الناس
و دخل الوالي و هو متأثر قوي و بيقول يااااه يا انبا تيموثاوس بقى كل اللي بسمعه ده صح انت قاعد هنا بتصلي 🙏 علشان خاطري وانا اللي ضايقتك و كنت بتفنن في عذابك قد كده المسيح ده جميل قد كده قالك حب كل الناس و انا اللي كنت فاكره كلام وخلاص
قاله الانبا تيموثاوس ده مش كلام و خلاص ده كلام الانجيل و دي حياتنا اللي بنعيشها و انا مستعد اعرفك كل حاجه عن المسيح اللي حبنا ❤️ و علمنا نحب كل الناس و نصلي لهم 🙏🙏 زي ما هو عمل على الصليب
قاله الوالي و انا مستعد اتعلم منك كل حاجه انا هسيب مركزي كوالي و كمان هسمع منك كل حاجه عن المسيح و اتعمد و كمان هبقى راهب و هعيش على طول لربنا اللي حبني و علمني احب كل الناس❤️ و اصلي ليهم 🙏
🌹 الآية 🌹: احبوا اعداءكم باركوا لاعنيكم أحسنوا إلى مبغضيكم صلوا لأجل الذين يسيئون اليكم و يطردونكم (متى٤٤:٥)
واحنا ياولاد مالناش اعداء
عدونا الوحيد هو الشيطان
وممكن الشيطان يسيطر علي أي إنسان ضعيف ويخليه يسمع كلامه ويطيع أوامره أنه يضرب حد أو يؤذي انسان أو يعذب قديس زي الوالي ما كان بيعمل مع الانبا تيموثاوس ويضايقه
الانسان ده بقي عامل زي العصاية في ايد الشيطان ..
هل لما حد يضربني بعصاية ازعل منه ولا من العصاية ؟؟؟
.. اكيد من اللي ماسك العصاية 😀 ..
والإنسان اللي في أيدين الشيطان ده ضعيف ومغلوب ومهزوم يحتاج إلي أننا نصلي له ان ربنا يرحمه من الشيطان المسيطر عليه زي ما عمل الانبا تيموثاوس وصلى من اجل الوالي..
علشان كده وصية السيد المسيح بتقول أحبوا أعدائكم المنظورين ( اللي شايفينهم) اللي هما في الحقيقة مضحوك عليهم من الشياطين الغير منظورين ..
🌹 التدريب🌹
+ عدم الغضب من الآخرين أو الكراهية لأننا نحبهم كما احبنا الرب يسوع
+اطلب من ربنا عند غضبي من اي شخص ان يعطيني مشاعر التسامح و المحبه
+ اصلي🙏 من أجل المسيئين اليّ واسامحهم🤝