رحلات الكاروز العظيم القديس بولس

درسنا بيتكلم عن الرحلة الأولى للكاروز العظيم بولس الرسول 🧔

🎈الهدف من الدرس🎈:

👈 ان يعرف الطفل المدن والأحداث فى الرحلة الأولى
👈 ان يشعر الطفل بتعب القديس بولس فى الرحلات
👈 ان يتدرب الطفل على قراءة الاصحاح 13و14 من سفر اعمال الرسل
🎈 أية الدرس🎈:
"انتشرت كلمة الرب فى كل الكورة" (اع 13 : 49)

🎈 مرجع الدرس🎈:
👈سفر اعمال الرسل اصحاح 13 و14

🎈 الدرس🎈:-

🎀 اتولد القديس بولس فى طرسوس فى اسيا الصغرى (تركيا حاليا) وكان له أسمين
(اسم يهودي ) وهو شاول بمعنى مطلوب
والاسم الثاني (إسم روماني) وهو بولس بمعنى صغير وشاول من سبط بنيامين

🎀 اتمرن على قراءة الاسفار المقدسة وهو عنده 5 سنوات📜 ولما كان عنده 10 سنوات بدأ دراسته فى طرسوس ✍ وفى سن 15 سنة راح اورشليم وتتلمذ علي يد غمالائيل اعظم معلم اليهود فى القرن الأول
🎀 وكان يهودى متعصب ومش بيحب المسيحيين وكان بيجيبهم أسرى لرؤساء الكهنة وكمان كان حاضر رجم الشهيد إسطفانوس رئيس الشمامسه وأول الشهداء وكان بيحرس ملابس الناس اللي رجموا الشهيد اسطفانوس
وفى مرة وهو مسافر دمشق علشان يدور على المسيحيين ظهر له بابا يسوع وقاله:شاول شاول لماذا تضطهدنى؟؟؟؟

فرد شاول:من انت ياسيد؟؟
فقال الرب:انا يسوع الذى انت تضطهده
فقال شاول وهو خايف:ماذا تريد ان افعل؟ فطلب منه السيد المسيح انه يروح للقديس حنانيا في دمشق وهو هيقوله يعمل ايه
وفعلا راح شاول قابل القديس حنانيا وأتعمد كمان .
راح شاول في الصحراء وقعد ٣ سنوات للتوبة والتأمل كخلوه للاستعداد للكرازة

وتحول من شاول لبولس كاروز للمسيحية وكتب بولس 14 رسالة 📜 📚

🎀 بدأ خدمته بين انطاكية وطرسوس واستشهد على يد نيرون فى 5 ابيب (12يولية)
🎀 عمل بولس الرسول 3 رحلات تبشيرية باسم السيد المسيح

الرحلة التبشيرية الأولى كانت ما بين 45 الى 48م
الرحلة الثانية التبشيرية كانت ما بين 50 الى 53م
الرحلة الثالثة التبشيرية كانت ما بين 54 الى 58م

وطبعاً زمان يا اولاد كان السفر صعب وخطير ورغم كده بولس سافر اماكن بعيدة واتعرض لأخطار كتير واضطهادات
🎀 وكمان كان بولس بيعانى من شوكة فى الجسد وهى قروح فى جسمه مع ضعف البصر ومع ذلك كان بيسافر من مكان لاخر عشان يبشر بالسيد المسيح بإرشاد الروح القدس

☝اول رحلة كانت مع القديس برنابا وبدأت من انطاكية.. كان فى الوقت ده حصل اضطهاد للمسيحيين فى اليهودية وبعضهم راحوا انطاكية وبقى فيها كنيسة كبيره 💒

🎀 ارسلهم الروح القدس علشان يبشروا ويأسسوا كنائس💒💒💒💒 قال الروح القدس 🔥 افرزوا لي برنابا وشاول للعمل الذي دعوتهما اليه (أع 2:13)

🎀راح بولس وبرنابا ومرقس من ميناء سلوكية بانطاكية ووصلوا الى سلاميس(ميناء شرق جزيرة قبرص) وبشر برنابا وبولس ومرقس بالرب يسوع فى مجامع اليهود

🎀 من جزيرة قبرص راحوا بافوس وهناك قابلوا ساحر اسمه باريشوع مع الوالى سرجيوس ولكن بولس امتلأ من الروح القدس🔥 وقال للساحر هوذا يد الله عليك فتكون اعمى فأصيب بالعمى👀 وفى الحال آمن الوالى واعتمد 🤴
🎀 ومن بافوس راحوا مدينة برجة عاصمة بمفيليه فى أسيا الصغرى وهناك مرقس سابهم ورجع اورشليم

🎀 ومن برجة راحوا انطاكية بيسيدية ودخلوا المجمع يوم السبت ووعظ بولس فى السبت التالى وكل المدينة اجتمعت علشان تسمع كلمة ربنا وطبعا اليهود اتغاظو جدا 😡😖 واضطهدوا بولس وبرنابا وطردوهم من البلد

🎀 وراحوا الى ايقونية ويوم السبت راحوا المجمع واليهود اتغاظو 😡😖 وانشق جمهور المدينة وحاولوا يرجموا الرسولين

🎀 وبعدين راحوا مدينة لسترة وتتلمذ على يد بولس تيموثاوس واعترف هو وأمه وجدته بالسيد المسيح وكمان كان فيها رجل اعرج 🧎من بطن أمه فقاله بولس قم على رجليك منتصبا وفعلا قام في الحال🚶🏿‍♂️ (انتشرت كلمة الرب في كل الكورة ) ( اع 49:13)

وجه يهود انطاكية وايقونية الى لسترة وقلبوا الجموع👨‍👩‍👧‍👦 على بولس وبرنابا.. فرجموا بولس وجروه بره البلد افتكروه انه مات لكنه قام ودخل المدينة وتانى يوم خرج مع برنابا

🎀وراحوا دربة وبشروا هناك ورجعوا من الرحلة الاولى مرورا بلسترة وايقونية وانطاكية بيسيدية وبرجة واتاليا وسافروا فى البحر لمدينة سلوكية فى انطاكية وبعدها رجعوا وسافروا لانطاكية سوريا
وكان طبعا اثناء المرور كتير من الناس كانت بتؤمن بالمسيح واسسوا كنائس واقاموا قسوس ليها 💒💒💒

وكانت من الحاجات الحلوة للرحلة يا اولاد هي:-
١- ايمان سيرجيوس بولس والى مدينة بافوس .
٢- الوعظ في المجامع اليهودية .
٣- التعرف على تيموثاوس وأمه افنيكي وجدتة لؤيس.
٤- شفاء الأعرج من بطن أمه.
٥- تلمذوا كثيرين وبشروا في مدن كثيرة .
٦-وأقاموا قسوس للكنائس في طريق العودة.

🎈 التدريب 🎈
اننا نشهد للمسيح بتصرفاتنا الحلوة ونكون زي بولس الرسول كان امين في خدمته مع انه كان مريض ونظره ضعيف وشوكة في الجسد ومع كل دا كان بيسافر ويبشر الناس بالسيد المسيح والناس تمجد ربنا فينا لاننا اولاده 👭👬