سر المعمودية

⛪باسم الاب والابن والروح القدس اله واحد امين ⛪
التاريخ:-الجمعه الموافق


🌹احباؤنا اولياء الامور وأولادنا الحلوين🌹
20 يناير 2023 م
12 طوبة 1739 ش
🌟درسنا اليوم بيتكلم عن 🌟
💧💦💦 ((سر المعمودية)) 💧💦💦
💥آية الدرس💥
(( لكن اغتسلتم بل تقدستم بل تبررتم بإسم الرب يسوع وبروح إلهنا )) (١ كو ٦ : ١١)
🎯هدف الدرس 🎯
🏵ان يعرف الطفل طقس المعمودية .
🏵ان يشعر ببركات المعمودية .
🏵ان يتدرب على الحفاظ علي صورة المعمودية وممارسة سر التوبة والإعتراف .
🌺 الدرس :
⭐ طبعا يا حبايبي احنا عارفين ان عدد اسرار الكنيسة هم سبع اسرار :
سر المعمودية - سر الميرون - سر التوبة والاعتراف - سر التناول - سر مسحة المرضي - سر الزيجة - سر الكهنوت.
⭐ وكلمة سر في الكنيسة مش معناها انها حاجة المفروض منعرفهاش لا لكن معناها ان في حاجة عظيمة او معجزة ربنا بيعملها احنا مش شايفنها لكن بتفرحنا أوي ، السر هو نعمة وهدية من ربنا ❤❤.
⭐ وعشان السر يحصل بيحتاج ٣ حاجات أساسية :
ابونا القسيس
طقس ( صلوات خاصة بكل سر ) -
مادة السر زي الزيت او القربانة او المياه ...
⭐ في شرطين مهمين عشان نقدر ناخد اي سر من اسرار الكنيسة :
١) الإيمان ان ربنا بيعمل معجزة .
٢) التوبة والبعد عن الخطية .
⭐تعالوا مع بعض نعرف طقس المعمودية :
💥بيبتدي ابونا يصلي للأم ان ربنا يغفر لها خطاياها ويصلي للطفل عشان الشياطين تبعد عنه وبعدين يرشمهم بزيت اسمه (( الزيت الساذج)) وده زيت عادي مش متصلي عليه.
💥بعد كده يصلوا صلاة اسمها جحد الشيطان بيقولوا فيها للشيطان ابعد عن عيلتنا احنا مش عايزينك احنا بنحب ربنا وهنحافظ علي ايماننا دايما .
💥بعد كده يقف باباه ومامته يعترفوا بالايمان بالنيابة عنه لحد ما هو يكبر ويقول بنفسه في كل قداس (بالحقيقة نؤمن بإله واحد).
- ويكون المسئول عن تربيته قدام ربنا وتعليمه الصلاة وقراية الانجيل الاب او الام
- والشخص المسئول عن تعليم الطفل الايمان المسيحي⬅ الكنيسة بتسميه ((الاشبين)) .

💥وبعدها ابونا يرشم الطفل بزيت اسمه ((الغاليلاون)) اللي هو زيت الفرح عشان يفضل الطفل فرحان بربنا طول حياته .
💥وبعدين ابونا يقلعه هدومه ويغطسه في جرن المعمودية وهو عبارة عن حوض كبير فيه مياه (ابونا صلى عليها علشان تتقدس) بيغطسه فيها ٣ مرات باسم الاب والابن والروح القدس وكده كأنه مات واندفن زي المسيح وبعدها قام من الاموات و ساعتها ياخد الطفل بركات المعمودية ويكون :
انسان جديد ، ابن ربنا ، مولود من فوق ، شبه المسيح .
💥 بعد كده بندخل عالسر اللي بعده اللي هو سر الميرون ابونا بيمسك زيت الميرون ويطلب من ربنا ان الروح القدس يبارك الطفل ده ويدهن جسم الطفل حتة حتة رأسه و ودانه وعينيه وايديه ورجليه وظهره وبطنه عشان يبقي جسمه كله بتاع ربنا.
وأبونا بيرشمه ٣٦ رشمه
💥وبعدين يلبس ابيض زي الملايكة وعليه شريط احمر ( الزنار ) عشان نقوله ان اللي خلاك ابيض كده هو دم بابا يسوع اللي فدانا عالصليب .
بعدها مامته تاخده وتحضر بيه القداس ويتناول لأول مرة وبعد القداس الكنيسة بتعمله زفة جميلة خالص بتحتفل بيه عشان أصبح عضو جديد فيها .
💥 يكبر الطفل ويواظب عالتناول و يبدا يعرف الحاجات الوحشة اللي مينفعش يعملها واهله يعلموه انه يبطل اي خطية ويتوب عنها ويروح يعترف بيها لابونا ويتعلم يواظب علي سر التوبة والاعتراف .
💥اي حد فينا يا حبايبي يعمل خطية لازم يقعد مع نفسه ويتوب عنها ويطلب من ربنا يسامحه وبعدها يروح يعترف لابونا وابونا يحط الصليب علي راسه ويطلب من ربنا يسامحه عالخطايا دي وبعدها بابا يسوع بيشيل كل الخطايا دي ويبقى المعترف فرحان جدا كأنه اتعمد من جديد ورجع ابيض .
💥التوبة تسمي ((المعمودية الثانية))
المعمودية بتكون مرة واحدة بس زي ما بابا يسوع مات وقام مرة واحدة بس .
لكن التوبة بتتكرر بالظبط زي لما اكون بلعب كتير
واعرق اروح استحمي وارجع نضيف
كذلك التوبة كل ما اعمل خطايا اتوب عنها واعترف بيها وارجع ابيض تاني .
🌟التدريب🌟
💥 احنا يا حبايبي دلوقتي كبار و اخدنا بركة المعمودية بس الخطايا خلت الثوب الابيض بتاعنا يتوسخ يبقي الحل اني اقعد مع نفسي شوية وافتكر الحاجات اللي بعملها تزعل بابا يسوع واقوله سامحني انا مش هعملها تاني وساعدني اتوب عنها وبعدها نروح لابونا ونعترف ونرجع تاني نضاف وفرحانين .