قلب داود

بسم الاب والابن والروح القدس اله واحد امين
🌹 الدرس🌹
قلب داوود
🔸قصه اختيار داوود ملك 🔸
التاريخ🗓
٢ أبريل ٢٠٢١ م
٢٤برمهات ١٧٣٧ ش
🌹آية الدرس:🌹
➕لان الإنسان ينظر الي العينين واما الرب فإنه ينظر الي القلب (١صم ١٦ : ٧)➕
هدف الدرس🌹
📍ان يعرف الطفل :
كيف تم اختيار داوود.
📍ان يشعر :
بإرادة الله في حياته .
📍ان يتدرب على :
الصلاة في كل وقت ونصلي قبل اختيار اي شئ في حياتنا .

🌺 ازيكم يا ولاد يا حلوين النهارده هنتكلم عن واحد حلو خالص من العهد القديم وبقي ملك لإسرائيل تحبوا تعرفوا هو مين؟ تعالوا نشوف هو مين❤️
زمان خالص كان في نبي حلو اسمه صمؤيل لما لقى ان ملك اسرائيل في الوقت ده وهو شاول الملك عمل حاجات وحشه زعلت ربنا منه، صلى صمؤيل🙏 لربنا؛ فسمع صمؤيل 🦻صوت ربنا وقاله ان هو سمع صلاته وقاله يروح بلد اسمها بيت لحم ويسأل علي بيت واحد اسمه يسى البيت لحمي و ياخد معاه الزيت⚱️ عشان من البيت ده هيختار ملك 🤴جديد لشعب اسرائيل و ياخد معاه كمان عجل🐐 وهناك يقول انه هيقدم ذبيحه لربنا وربنا هيعرفه مين هو الملك🤴 اللي اختاره تفتكرواالملك ده هيكون شكله ايه ومواصفاته ايه، مع العلم ان في ايه حلوه بتقول( لان الانسان ينظر الي العينين واما الرب فإنه ينظر الي القلب) وفعلا يا حبايبي صمؤيل النبي سمع كلام ربنا واخد الزيت ⚱️ وراح على بلد بيت لحم ودور علي بيت يسى البيت لحمي وقالهم أنهم يجهزوا نفسهم ويستعدوا عشان يقدموا ذبيحة🐐 لربنا.
وطلب صمؤيل من يسي انه يقدم له كل أولاده 👨‍👨‍👧‍👦وفعلا جاب يسى كل ولاده ودخل الولد الكبير وكان ضخم وشكله جميل وافتكر صمؤيل ان هو ده اللي هيكون الملك 🤴عشان قوي وشكله جميل لكن ربنا قال صمؤيل متبصش علي الشكل لكن بص على القلب💓 عشان ربنا اهم حاجه عنده القلب الحلو 💓 زي الايه اللي بتقول( لان الانسان ينظر الي العينين واما الرب فإنه ينظر الي القلب) وفعلا جه كل ولاد يسى لكن ربنا مخترش ولا واحد من دول
فسأل صمؤيل النبي يسى وقاله هما دول كل ولادك؟ قاله يسى ان لسه في واحد صغير👦 اسمه داوود بيرعي الغنم🐑🐑🐑🐑 بره فطلب صمؤيل انه ينادي عليه وفعلا جه داوود 👦وساعتها ربنا قال صمؤيل النبي ان هو ده اللي هيكون ملك🤴 علي شعب اسرائيل وفعلا صب صمؤيل النبي الزيت على رأس داوود عشان يكون ملك 🤴على اسرائيل ومن يومها روح الله بقت مع داوود الجميل عشان قلبه دايما كان حلو ومع ربنا عرفتوا بقي مين هو الملك🤴 اللي اختاره ربنا لشعبه هو الملك داوود كاتب سفر المزامير وصاحب القلب الحلو💓 اللي تبع مشيئة الله ياريت قلبنا ❤️ احنا كمان يكون زي قلب داوود مليان حب لكل الناس ويسامح الأخرين ويتمنى الخير للكل ، ونصلي دايما قبل ما نعمل اي حاجه في حياتنا ونقدم مشيئة ربنا في حياتنا عشان هو دايما بيختار لينا احسن حاجه
الله يعطينا ان نكون سامعين عاملين لمجد اسمه القدوس امين.