مريم أخت موسى ومشاعرها تجاه أمها

باسم الاب والابن والروح القدس اله واحد امين

🌹احباؤنا اولياء الامور وأولادنا الحلوين🌹
🌟درسنا اليوم بيتكلم عن 🌟
❤️❤️ ((مريم اخت موسي النبي))❤️❤️
💥ايه الدرس💥
(( لا تقل إني ولد )) ( ارميا ١ : ٧ )
🎯هدف الدرس 🎯
🏵ان يعرف ان له دور هام رغم صغر سنه .
🏵ان يشعر باحتياجات الاخرين .
🏵ان يتدرب على ان يأخذ خطوات ايجابية وتقديم المساعدة .
🌺 الدرس :
⭐️ قصتنا انهارده عن بنت في سننا وهي مريم اخت موسي النبي وهارون تعالوا نشوف عملت ايه
💥زمان خالص كان عايش في مصر شعب العبرانيين اللي هو شعب ربنا وكان فرعون مصر رجل شرير ولاحظ ان عدد العبرانيين كتير وخاف منهم لحسن يبقوا اقوي منه فبقي بيشغلهم كتير ويتعبهم ويذلهم وبعد كده جاتله فكرة تانية عشان يقلل عددهم
💥 جاب الاتنين المولدات اللي بيولّدوا الستات العبرانيات وقالهم كل ما يجي ولد تقتلوه ولو جت بنت سيبوها تعيش عشان الشعب يبقي ضعيف .
💥لكن المولدات مسمعوش كلام فرعون ومحبوش يعملوا حاجة تزعل ربنا فلاحظ فرعون ان الاولاد لسه عايشين فاستدعاهم تاني وسالهم ليه منفذتوش كلامي ؟؟؟ قالوله اصل الستات العبرانيات اقوياء بيولدوا لوحدهم قبل ما احنا نوصل بيتهم .
💥فأصدر فرعون قرار ان اي صبي هيتولد يرموه في النهر . 😞😞😞
💥💥في الوقت ده كان في ست عندها بنت اسمها مريم وولد اسمه هارون جابتلهم اخ جديد اللي هو موسي ( اللي لما كبر بقي نبي عظيم وقاد شعب ربنا في البرية ٤٠ سنة ) وخافت ياخدوه منها ويقتلوه فخبته عندها ٣ شهور وساعتها بدا يكبر وصوته يعلي فاشترت سبت من البردي ودهنته مادة متخليش المياه تدخل جواه وحطت فيه موسي وغطته وراحت حطته في النهر وهي خايفة وحزينة انها هتسيبه.
💥💥 وقفت مريم اخته من بعيد عشان تطمن علي اخوها تشوف ايه اللي هيجري له والسبت اتحرك في المياه .
💥في الوقت ده كانت بنت فرعون نازلة تغتسل في النهر فشافت السبت وامرت واحدة من اللي شغالين عندها تشوف فيه ايه فشافوا جواه ولد جميل بيعيط فقالت ده اكيد من ولاد العبرانيين وقبل ما تفكر هل تاخده ولا ترميه جت مريم بسرعة وقالت لبنت فرعون تحبي اجيبلك مربية ترضعه وتبقي مسؤلة عنه ؟
💥وافقت وقالتلها اه هاتيها وفعلا جت ام موسي وبنت فرعون قالتلها رضعيه وانا هديكي اجرتك وبكده رجع ابنها لحضنها تاني وربته وكبرته في محبة ربنا .
💥💥ايه رايكوا بقي في شخصية مريم 🤔🤔
١) كانت شجاعة جدا ومخافتش لانها واثقة ان ربنا معاها .
٢) مقالتش خلاص وانا مالي ورجعت بيتها لأ دي فضلت متابعاه وكمان كلمت بنت فرعون وقدرت تساعد مامتها وتفرحها من تاني .
٣) كان قلبها مليان حب لأخوها وخايفة عليه .
💥💥احنا كمان لازم نبقي زي مريم لانها كانت صغيرة زينا بس عملت حاجات حلوة
طب ازاي احنا ممكن نبقي زيها واحنا صغيرين كده 🤔😍
(( لا تقل اني ولد )) انت تقدر تعمل حاجات كتير حلوة :
١) اكون شجاع وابقي واثق ان ربنا هيساعدني .
٢) احب ماما وبابا واخواتي من قلبي بجد واحاول افرحهم علي قد ما اقدر واصليلهم .
٣) اساعد ماما في شغل البيت وارتب اوضتي واذاكر .
٤) اساعد بابا و احترمه ولو احتاج حاجة اجيبهاله
٥) اتعامل مع اخواتي بهدوء واحترام واحبهم واخاف عليهم زي ما مريم حبت اخوها . علشان كدة الاية بتقول
🍁لاتقل إني ولد ار 7:1
🌟التدريب🌟
💥 نجيب ورقتين ورقة للتصرفات الحلوة وورقة للتصرفات الوحشة واركز في تصرفاتي كل ما اعمل حاجة حلوة احط علامة في الورقة بتاعتها
وكل ما اعمل تصرف وحش احط علامة في الورقة التانية وفي نهاية الاسبوع اشوف انهي ورقة علامتها اكتر واحاول ازود التصرفات الحلوة واقلل التصرفات الوحشة .
ولالهنا المجد الدائم والى الابد امين🙏