مقدمة فى سفر يشوع

🌹 احباؤنا اولياء الامور درسنا بنعمة ربنا عن مقدمة فى سفر يشوع 🌹
🗓️ التاريخ
الجمعة 21 اكتوبر 2022
الموافق 11 بابه 1739 ش

✝️ اسم الدرس : مقدمة فى سفر يشوع
( معونة الله تؤازرنا وتعطينا ثقة )

💠 هدف الدرس : مساعدة الطفل
📍ان یعرف فكرة عامة عن سفر يشوع
📍ان یشعر بقوة الله التى تحميه
📍ان یتدرب على طلب قوة الله دائما

💠 اية الدرس
" لا يقف انسان فى وجهك كل ايام حياتك . كما كنت مع موسى اكون معك لا اهملك ولا اتركك " ( يشوع ١ : ٥ ) .

☘️ الـدرس ☘️

🍄 شخصية يشوع 🧔🏻
اسم يشوع معناه " مخلص " وهو هو نفس معنى اسم ( يسوع ) وكان يشوع خادم موسى النبى ولما مات موسى النبى تولى يشوع القيادة .
ويشوع بيرمز للمسيح يسوع اللى خلصنا من العبودية ونقلنا معاه للسما اللى هتكون وطننا الجميل بعد ما نروح له . زى ما يشوع قاد شعب بنى اسرائيل للدخول الى ارض الموعد اللى ربنا وعد بيها شعبه وهو بيخرج من ارض مصر .

🍄 سفر يشوع 📖
أهم حاجة نلاحظها فى سفر يشوع لما نقراه انه بيحكى ازاى ربنا بيقف مع اولاده وشعبه وسط المشاكل والصعوبات حتى لو اولاده ماعندهمش قوة على المشاكل القوية ربنا هو اللى بيقف قصاد المشاكل ويحلها ويقف مع اولاده فى كل وقت ويشددهم ويشجعهم مع حاجة مهمة جداً وهى حفظ وصايا ربنا والتمسك بيها .

👈 تعالوا مع بعض نشوف ملخص احداث السفر 👇

1️⃣ يشوع وراحاب🧔🏻👵🏼
يشوع قال لرجلين من جيشه يذهبوا ويتجسسوا على مدينة اريحا . فدخل الراجلين وراحوا عند واحدة اسمها راحاب اللى عرضت عليهم انها تساعدهم وتخبئهم عندها فى البيت . وفضل يدور عليهم الجنود وملاقوش الجاسوسين . وبعد ما مهمة الجاسوسين خلصت راحاب طلبت منهم انهم وقت الحرب ما يموتوهاش هى واهل بيتها .
وفعلا قالوا لها علامة انها تحط حبل لونه احمر وهم مش هيضروها هى واهل بيتها .

2️⃣ عبور نهر الاردن 🌊
يشوع وشعب الله كان لازم يعدوا الناحية التانية من نهر الاردن وربنا قال ليشوع انه يشق النهر زى ما موسى شق البحر وفعلا المية بدأت تقل والارض اللى تحت النهر ظهرت وشعب الله عبروا نهر الاردن بمعجزة الهية 👈 طبعا ربنا اللى بيحب شعبه بيعرف يخلى باله منهم كويس ويمشى معاهم طول الطريق وعلشان شعب الله مينساش المعجزة القوية دى .
كل سبط من اسباط بنى اسرائيل اخد حجرة من قاع النهر وحطوا الحجارة فوق بعض بعد كده وعملوا بيها كومة مرتفعة علشان دايما يفتكروا معونة ربنا ليهم .

3️⃣ وقوف الشمس 🌞
لما سمع الملوك اللى حوالين نهر الاردن ان يشوع بيحارب كل الملوك اللى حواليه وينتصر عليهم . اتوحدوا وعملوا جيش قوى جداً علشان يحاربوا يشوع وشعب الله . وزى ما قولنا كان ربنا واقف مع يشوع وبيحافظ على شعبه وخلاهم ينتصروا على الجيوش اللى اتجمعوا عليهم انتصار كبير . ووسط الحرب ربنا خلى الشمس توقف وماتتحركش علشان اليوم يكون اطول وشعبه ينتصر على الاعداء اللى بيحاربهم .

4️⃣ اسوار اريحا 🟫🟫
كانت اريحا مدينة قوية جدا واسوارها متينة وعالية وكان يشوع لازم يحارب مدينة اريحا وربنا قال له انه يخلى الشعب كله وامامهم الكهنة يلفوا حوالين الاسوار وهما بيبوقوا علشان فرحانين بالانتصار اللى هيحصل في اليوم السابع . كل يوم يلفوا لفة كاملة حوالين السور وفى اليوم السابع يلفوا سبع مرات وساعتها الاسوار هاتتهدم بقوة ربنا . وشعب الله هايقدر يدخل المدينة ويحاربها وينتصر عليها . وربنا قال لشعبه ما ياخدوش اى حاجة من المدينة لا ذهب ولا فضة ولا اى حاجة .
👈 وبكده نتعلم ان مهما كانت المشاكل قوية زى اسوار اريحا 👈 أصلى وانا واثق فى أيد ربنا القوية اللى بتكسر اى مشاكل قدامى .

5️⃣ عاخان بن كرمى 🧔🏽
بعد ما شعب الله انتصر على المدينة القوية اريحا اللى شعبها كبير واسوارها جبارة . كان فيه بلد صغيرة اسمها عاى انهزم قدامها شعب الله .
طيب ازاى مدينة صغيرة كده تهزم شعب الله بالرغم انه هزم ممالك قوية ؟
السبب ان واحد من الشعب ماسمعش كلام ربنا وراح يأخد اشياء من الذهب من مدينة اريحا . والراجل ده خلى ربنا يسيب شعبه لان ربنا القدوس ماينفعش يكون موجود فى مكان غير مقدس والحاجات دى كانت بتستخدم للشر فى عبادة الاصنام .
يشوع عمل قرعة وعرف ان الشخص ده هو عاخان بن كرمى حكم عليه انه يموت لانه ماسمعش كلام ربنا 👈 وده يعلمنا ان لو انا عندى حاجة وحشة يبقى لازم اقاومها علشان جسمى وعقلى يكونوا حلوين ومقدسين وبكده انا اكون انسان مقدس وروح ربنا يفضل فى قلبى . وبعد كده شعب الله حارب مدينة عاى وانتصروا عليها تانى بقوة ربنا اللى كان معاهم فى كل مكان بيحافظ عليهم .

6️⃣ وصية يشوع وموته 📜
لما جه موعد انتقال يشوع كان عنده ١١٠ سنة فجمع الشعب وفكرهم ان ربنا انقذهم من العبودية فى ارض مصر وانه كان معاهم طول الطريق وحافظ عليهم لغاية دلوقت وهم ساكنين ومبسوطين فى ارضهم ووصاهم انهم يكونوا دايما مع ربنا ومايعملوش حاجة تزعله .
ومات يشوع ولغاية اخر لحظة فى حياته كان واثق ان ربنا معاه طول ايام حياته وماحدش يعرف ينتصر عليه طول ما ربنا معاه .

🌐 التدريب
❤️ انا اكون واثق تماما ان زى ما ربنا شدد وشجع يشوع وكان معاه هو كمان معايا وبيقوينى ويشجعنى وانا كمان لازم اعمل بوصاياه .
❤️ نفتكر دايما الحاجات الكتيرة الحلوة اللى عملها ربنا معانا قبل كده علشان تعطينا ثقة فى معونة ربنا وانه اكيد مش هايسيبنا ابدا فى المستقبل .
❤️ نحفظ الايات الجميلة اللى بتفكرنا وبتاكد لينا عناية الله الدائمة ورعايته لاولاده زى اية النهاردة 👇
" لا يقف انسان فى وجهك كل ايام حياتك . كما كنت مع موسى اكون معك لا اهملك ولا اتركك " ( يشوع ١ : ٥ ) .
ولالهنا كل مجد وكرامة الى الابد امين 🙏