نحميا

✨بِسْم الأب والابن والروح القدس اله واحد امين ✨
🗓التاريخ الجمعه الموافق
30 ديسمبر 2022 م
21 كيهك 1739ش
أحباؤنا أولياء الأمور وأولادنا الحلوين
📍درسنا الْيَوْمَ بيتكلم عن القياده والبناء الروحى (نحميا)📍
📖آيه الدرس
"إله السماء يعطينا النجاح ونحن عبيده نقوم ونبنى" ( نحميا ٢٠:٢)
🎯هدف الدرس
🔹ان يعرف دوره فى قياده حواسه وافكاره بطريقه روحيه
🔹ان يشعر ان الالتزام بقوانين الرب منفعه لكل الناس
🔹ان يتدرب على تخصيص وقت من صلاته لبناء أسواره الداخلية
📍الدرس
فيه ايه فى الكتاب المقدس 📖بتقول (*اله السماء يعطينا النجاح ونحن عبيده نقوم ونبنى*) حد يعرف الايه دى قصتها ايه ومكتوبة فين فى الكتاب المقدس
♦️الايه دى ورآها قصه نجاح كبيره اوى لقائد عظيم فى العهد القديم اسمه نحميا
نحميا كان قائد عظيم
وَقّاد شعب بنى اسرائيل لبناء سُوَر اورشليم
وفى الوقت ده كان شعب اسرائيل
مسبى فى بابل ومسبى يعنى بيشتغلوا زى العبيد فى بلاد بابل وفى الوقت ده كان الملك بتاعها اسمه ارتحشستا الملك🤴ونحميا كان من اهم مساعدوا الملك لانه كان شغال (ساقى الملك) يعنى هو المسئول عن تقديم
المشروبات للملك وطبعا نحميا كان امين ومبتسم على طول وعلشان كده اتعين فى المكان ده
♦️وفى مرة سأل نحميا احد أقاربه عن أورشليم فرد علية ، المدينة اللى عاش فيها ابائنامدمره خالص حتى الأبواب بتاعتها أكلتها النار فتضايق نحميا خالص وراح صلى🙏 لربنا وقاله يارب انا عارف ان شعب بنى اسرائيل اخطأ أمامك ولكن انت وعدتنا لو رجعنا عن الطرق الوحشه بتاعتنا انت هتسامحنا وهتظهر قوتك معانا ويارب لتكن إذنك مصغيه لصلوة عبدك وأعط النجاح الْيَوْمَ لعبدك وامنحه رحمه امام الملك
♦️وفعلا دخل نحميا للملك علشان يقدم له العصيروالملك لاحظ ان نحميا زعلان فسأله ليه زعلان ورد عليه نحميا وقاله لان اسوارمدينه آبائي مدمره وأبوابها محترقه فكيف لا احزن
وقاله الملك انت عاوز ايه ؟ فقاله انك تسمح لى اروح أرمم اسوار المدينة فوافق الملك وجعله والياً على أورشليم لمدة ٢٦ سنة👈ودى اول بركه من بركات الصلاه وسأله الملك أساعدك ازاى ودى البركه التانيه فطلب من الملك رساله لكل الأمراء بتاعه البلاد اللى هيعدي فيها علشان يسمحوله بالمرور وطلب كمان خشب علشان يبنى الأسوار وكذلك أبواب المدينه
وأرسل الملك الى حارس حدائق الملك علشان يعطى لنحميا الأخشاب اللى محتاجها
♦️ووصل نحميا الى أورشليم وجمع كل المسئولين عن المدينه وقالهم هلم نبنى أسوار أورشليم وقالهم ان ربنا مبارك العمل والملك كمان
♦️نحميا كقائد كان عنده إيمان وحماس ان ربنا معاهم وقسم العمل فى بناء السور على أسباط بنى اسرائيل علشان يتعمل أسرع
♦️وكان فيه واحد اسمه سنبلط وصديقيه اسمهم طوبيا وجشم😠😡😠 كانوا مش من شعب اسرائيل ومش عاوزين بناء السور يكتمل لان السور وهو
مهدم كانوا يقدروا يدخلوا المدينه في اي وقت ويعملوا اللي هما عايزينه وكانوا بيسخروا من شعب ربنا وهو يبني السور ويقولوا ان لو ثعلب هجم على السور هيوقعه 🤣🤣🤣وبعد كده خططوا لمحاربه أورشليم فلجأ نحميا للصلاه وطلب من الله حمايتهم ووضع نحميا حراساًعلشان يحموا الشعب وهما بيبنوا السور
♦️بدأالشعب يخاف لكن نحميا كان بيقويهم ويفكرهم ان ربنا معاهم ومفيش حد هيقدر عليهم
وتم بناء السور وتركيب الأبواب .
♦️لما شاف الأشرار ان نحميا والشعب بنوا السور ، ارسلوا الى نحميا علشان يقبلوه فى مكان بعيد عشان يضروه لكنه بحكمته رفض وقادهم انه مش هيقدر يقابلهم .
♦️ وبكدة أصبحت المدينة آمنة ، وأسوارها حصينة ، وعاد كثير من اليهود الى أورشليم وبقى نحميا فى أورشليم وساعد الشعب على طاعة الله
♦️ شوفنا ازاى نحميا كان قائد عظيم ، وكان فيه صفات جميلة الأمانة ، حبه لأورشليم ، محب للصلاة ، لا يخاف لأن ربنا معه ، حكمته فى التعامل مع الأشرار ، وده اللى خلاه ينجح فى بناء سور أورشليم
♦️انا كمان لازم أكون زي نحميا عندى هدف ابنى اسوارلأحمى نفسى وامنع عدو الخير انه يدخلها


📝تدريب
كل واحد فينا قائدويبني اسوار على حواسه
عينك 👀انها تشوف الحاجه الحلوه بس
فمك 👄انه يقول كلام كويس
إذنك 👂تسمع الكلام الكويس
قلبك ❤يحب الناس
عقلك يفكر فى الحاجات الإيجابية
وده كله يحصل بالصلاه 🙏انك تطلب من ربنا يعطيك عنّين وقلب وإذنين وفم كويسين يفرحوا ربنا