يسوع المسيح هو الله لأنه يعمل أعمال الله

يسوع المسيح هو الله لانه يعمل اعمال الله
🔸الله يحبني فجعلني متميزا اذ اخد طبيعتي وباركها واعلن لي ذاته فأومن به لتكون لي حياة ابدية بإسمه
🔸امثله لثلاث معجزات صنعها الرب يسوع تثبت لاهوته
التاريخ🗓
9 /12/ 2022
30 هاتور 1739 ش
🌹آيه الدرس:🌹
➕ فان لم تؤمنوا بى فآمنوا بالاعمال (يو 10 :38)➕
هدف الدرس🌹
📍ان يعرف الطفل
اعمال الله ويذكرها.
📍ان يشعر
بعظمه اعمال الله.
📍ان يتدرب على
ان يثق بان المسح هو الله.

🌺ازيكم ياحابيبى الحلوين النهارده درسنا جميل اوى وممتع ، بس الاول هنسأل سؤال مين مصدر المعجزات على الارض وايه معنى كلمه معجزه؟؟؟ برافو .. الله هو مصدر المعجزات من بدايه الخلق حتى الان لان ده من طبيعه الله الفائقه
ومعجزه معناها فعل عمل لا يقدرالانسان العادي ان يفعله

وقبل كل شى وقبل ما نتكلم عن المعجزات الجميله اللى عملها الرب يسوع تعالوا مع بعض نقترب اكتر من شخصيه يسوع ، لما نقرأ فى الكتاب المقدس هنلاقى شخص يسوع المحب الحلو الطيب اللى بيخاف على اولاده وبيحميهم ويشفيهم ويقويهم ويغفر لهم الخطايا وينصفهم ،
كتير كتير من الناس آمنت بالرب يسوع لانهم شافوا فيه الله المتجسد لكن للاسف كان فيه ناس كتير متردده فى الايمان بالمسيح علشان كده الله اظهر نفسه بالمعجزات علشان الناس تؤمن وقال:
فان لم تؤمنوا بى فآمنوا بالاعمال
معنى كده ان المسيح قال لهم اقتربوا منى ولما تعرفونى كويس وتتعرفوا علي هتؤمنوا بي
شوفوا المعجزات دى اللى محدش يقدر يعملها الا الله وحده.
المعجزه الاولى:
فى يوم من الايام كان ربنا يسوع بيعلم الشعب وكان فى البلد دى مفلوج يعنى مشلول واصحابه قرروا انهم يروحوا بيه للمكان اللى بيوعظ فيه ربنا يسوع وفعلا حملوه ولما وصلو لقيوا زحمه كبيره جداً وفكروا انهم يطلعوا فوق السطح وينزلوه من فوق البيت وفعلاً واثناء حضور الكل نزل المفلوج من السقف وقاله ربنا لك اقول قم واحمل سريرك وامشى وفى الحال مشى الرجل المفلوح واتعجب الجميع.وقالوا مين يقدر يشفي ويعمل معجزه زي دي..
اكيد الله اللي خلق كل شيء
المعجزه التانيه:
كان مره ماشى ربنا يسوع مع بطرس وهما فى الطريق قابله واحد بيجمع ضرائب وقال لبطرس هو المعلم مش هيدفع الضرائب ولما عرف ربنا يسوع راح قال لبطرس اذهب اصطاد سمك واول سمكه افتحها هتلاقى استار (العمله في الوقت ده وكانت عمله معدنيه )ادفعها عنى وعنك فعلاً كل اللى قاله ربنا حصل كله.
المعجزه التالته:
رجل اسمه يايرس كانت بنته تعبانه فجرى على الرب يسوع علشان يجي يشفيها لكن ساعتها جه ناس واخبرو الرجل ان بنته ماتت فحزن جداً لكن ربنا يسوع قاله لا تخف امن فقط وذهب الى بيته ووجد ناس كتير بتعيط وقال لهم ليه بتعيطو البنت نايمه فقط ودخل ليها الرب يسوع مع تلاته من التلاميذ وابوها ومامتها وقال لها : ياصبيه لكى اقول قومى فقامت البنت بعدما كانت ميته وكل الناس استغربت جداً.

🍀التدريب 🍀:-
👈🏻لازم نقراء فى الكتاب المقدس مع بابا وماما علشان نتعرف اكتر واكتر على شخصيه ربنا يسوع الحلو وهنكتشفها فى مواقف كتيره ونعرف قوه معجزاته
التي تؤكد لنا انه هو الله.

👈نردد طول اليوم صلاه يسوع
( يا ربي يسوع المسيح ابن الله
ارحمني انا الخاطئ)

👈نحفظ آيات تؤكد ان المسيح هو ابن الله
رو ٩ :٥ - يو ٢٠ : ٢٨
مت ١: ٢٣ - ١ تي ٣ : ١٦

🌟الله يعطينا ان نكون سامعين عاملين له كل المجد
امين 🙏🏻🙏🏻